சென்னையில் பாஜக பிரமுகர் படுகொலை.. எடப்பாடியில் தலைமறைவாகி இருந்த 4 பேர் கைது..!

சென்னை கீழ்ப்பாக்கத்தை சேர்ந்த பாலச்சந்தர் (34), பாஜக பட்டியலின பிரிவு மத்திய சென்னை மாவட்ட தலைவராக இருந்து வந்தார். சிந்தாதரிப்பேட்டையில் நேற்று முன்தினம், 6 பேர் கொண்ட மர்ம கும்பலால் பாலசந்தர் வெட்டி படுகொலை செய்யப்பட்டார்.

இதுதொடர்பான வழக்கில் பிரதீப், சஞ்சய், கலைவாணன் ஆகிய 3 பேர் மீது போலீசார் வழக்கு பதிவு செய்திருந்தனர். மேலும், இது முன்விரோதம் காரணமாக நடந்த கொலை என காவல் ஆணையர் சங்கர் ஜிவால் தெரிவித்திருந்தார். மேலும், குற்றவாளிகளை பிடிக்க 4 தனிப்படைகள் அமைப்பட்டிருப்பதாகவும் தெரிவித்திருந்தார்.

இந்நிலையில், பாஜக பிரமுகர் கொலை வழக்கில் 4 பேரை தனிப்படை போலீசார் கைது செய்துள்ளனர். சேலம் எடப்பாடி பகுதியில் தலைமறைவாகி இருந்த பிரதீப், சஞ்சய், கலை, ஜோதி ஆகிய 4 பேரையும் கைது செய்து போலீசார், விசாரணை நடத்தி வருகின்றனர்.

பாலசந்தருக்கு ஏற்கனவே கொலை மிரட்டல் இருந்ததால் போலீஸ் பாதுகாப்பு வழங்கப்பட்டிருந்தது. இருப்பினும், பணியில் அலட்சியமாக இருந்த காரணத்திற்காக காவலர் ஒருவர் பணியிடை நீக்கம் செய்யப்பட்டது குறிப்பிடத்தக்கது.